OLOH PINTAR BARA HILA TIMOR

 Mateus 2:1-12

Are bewei ampin macam oloh pintar melai penda andau toh. Hong Ewanggelion Mateus 2:1-12 imparahan akan itah tege telo macam ampin oloh pintar. Tege oloh pintar mangalintar, tege je tapas kapintar, kea aton oloh je puna toto pintar. Palus kilen ampin panyalahe ampin telo macam kapinter jete?

1. Raja Herodes (Pintar mangalintar)

Ie te Raja. Musti bewei ie te oloh pintar. Dia maka tau jadi raja amon ie te oloh homong. Baya kapintar aie te kapintar je inggare “pintar mangalintar”. Kilen ampin bandae oloh je inyewut pintar mangalintar te? Narai panyalahe Raja Herodes te kapintar aie inggare kapintar je mangalintar?

Amon itah moap Surat Barasih, kilau melai Ewanggelion Mateius bagi due toh, batarang haliai imparahan akan itah. Katika Oloh Pintar bara hila Timor dumah misek Raja Herodes tahiu perkara Rajan oloh Yahudi ije taheta inakan, ie paham tangkejet. Mbuhen ie tangkejet? Tantu bewei awi kabar te manjadi gangguan akae. Palus lembut tiroke manggau akal handak mampalumat te.

Oloh ije pintar mangalintar, jete kapintar je pura-pura, kapintar hapan manyahokan taloh basilim papa hong arepe, kea kapintar hapan mampadaya mampahomong oloh beken. Hetoh batantu haliai ampin kapintar je ingguna Herodes te handak mampahomong Oloh Pintar Bara Hila Timor. Maka kuan Herodes dengan ewen: “Lius, gau anak te bua-buah; maka amon keton sundau ie, sanan te akangku, mangat aku kea manalih, manyembah ie.” (Ay.8).

Auch Herodes te baya pura-pura bewei, baya kapintar mangalintar hapae manyahokan taloh basilim papa hong ateie, basa amun ie sundau anak awau (Raja Taheta) te, musti impateie, awi jete musuh, saingan akae. Kuae amon pasuru anak awau te ie kea akan manyembah, jete tanjaro bewei, hapae mamparata jalae, mangat oloh Pintar bara hila Timor te harap auch ayue te, tontang bajeleng manyundau anak awau te, mangat ie bajeleng kea malalus kare niat papa handak mampalumat anak awau te.

2. Kapala Imam tontang oloh Tamat Surat (Tapas Kapintar)

Kapala Imam tontang oloh Tamat Surat kea oloh pintar. Amon jaton kapintar kaharati mangatawan panyalah soal atoran sumbayang, soal agama, soal auch riman suang kotak Hukum Taurat, mustahel ewen iangkat melai jabatan jete, manjadi kare Kapala Imam. Mustahel ewen te inggare oloh Tamat Surat. Dia inggare oloh balajar surat, tapi “tamat” surat.

Ewen puna paceh toto hafal auh kare nujum kawan nabi melai surat barasih. Ewen mansuman akan Herodes auch nujum te: “Koan ewen dengae: Intu Betlehem hong tanah Yudea; karana kalotoh auch surat nabi: “Maka ikau, o Betlehem hong tanah Yuda, ikau jaton toto kurik haliai intu bentok kare mantir Yuda; karana bara ikau kareh lembut mantir te, ije manyakatik utus oloh ayungku, Israel.” Tapi ampie kapintar ewen te lalangen bewei. Sewute bewei je pintar, tapi langena, tapas kapintare. Baya pintar mambasae, tapi dia ati kaharatie tahiu narai suang isi je imbasae (Ay.4-6).

Jaka toto ewen te pintar, tantu bewei ewen pasti salabih helo bara oloh pintar bara hila Timor te manasaran manggau anak awau te, awi jete puna aton jari tarasurat melai Surat Barasih ain ewen. Tapi ampie dia, ewen dia hage-hager hingkat bara eka ewen. Padahal jete tukep toto omba eka ewen! Buhen bukue? Jaton beken, awi tapas kapintare!

Oloh je tapas kapintare, antah jete sacara umum, atawa tapas kapintare soal Agama, puna are manampa masalah hong pambelom bentok masyarakat. Kapintar baya hong teori, tapi hindai buah hong praktek. Kapintar je macam te, jete kapintar je dia baguna, hayang bewei. Kapintar je baya akan jongos oloh. Baya kapintar hapan manjelap, tapi dia kapintar akan katetek, katindoh manempo Hatalla. Manaharep oloh je tapas kapintare, puna bahali toto.

3. Oloh Pintar Bara Hila Timor (Puna Toto Pintar)

Oloh Pintar bara hila Timor, jete oloh pintar. Puna toto-toto pintar. Pintar ije aton kaharatie. Kapintar ewen te batanto haliai katika ewen manggau auch barita mahalau oloh je ianggap katawan barita, iete oloh tempon kuasa, Raja Herodes. Dia mambarangai eka misek (Ay.1-2).

Kalote kea, ewen mangguna kapintar akan manggau kahalap, taloh je barega hong pambelom. Kapintar je hapadanan hasaroroi tandipah auch Hatalla. Dia kapintar je marusak, hapan malawan Hatalla, awi handak jadi Hatalla. Tapi kapintar je magah ewen manempo Hatalla je bujur, tontang mahingkep mahormat Hatalla, dia baya hapan auch, tapi hapan gawi mukei ramo manenga je bahalap, bulau, garo, tontang minyak mor (Ay.11).

Batarang kea, katika ewen impingat Hatalla hajamban nupi bele ewen buli tinai tanggoh Herodes. Ewen olih marima jete bua-buah, tontang mantoh tagal karandah atei tandipah Hatalla, palus manomon peteh te. Kapintar je tege kaharati mangatawean narai je bahalap ije perlu ilalus, tontang narai je papa, je ela ilalus (Ay.12).

Jetoh kapintar je puna toto pintar. Kapintar je akan kaharati, kapintar je baguna. Kapintar oloh tetek ije magah ewen manintu kabujur, karasih, kamantoh, manempo Hatalla. Kapintar je tau akan sonto, kapintar je imberkat tontang ingilak Hatalla. Enkah kapintar itah puna toto kapintar je imberkat tontang ingilak Hatalla? Amen!